Review of "Voyageurs" (Margaret Elphinstone)
Author(s): Liz Niven
Copyright holder(s): Liz Niven
‘Voyageurs’ is Margaret Elphinstone’s seventh novel. It’s a fine story in weel kent classical mode; the quest o a brither seekin his sister in a faur aff and exotic lan, gey different fae his hame.
Mark is a Quaker fae Cumberland whae decides tae gan tae Canada tae fin his sister Rachel. She has merriet a Scotsman, Alan Mackenzie, bit she has suddenly disappearit intae the ‘uncharted wilderness’ in the unsettled regions o North America. The buik opens in the year 1812 an the reader embarks oan a lang journey wi Mark as he tracks across the muckle plains an sails up the rivers wi the canots du maitre.
The buik is a wunnerful portrait o Canada oan the verge o the Wars o Independence and in fact we fin oot as the plot unfolds, that Rachel’s husband is gey deeply involvit in the turmoils o the time.
The landscape and geography o Canada is intricately depictit and the novelist has researched her setting meticulously then portrayed it graphically.Wi a smatterin o the geography o Cumberlan we see the twa societies an landscapes juxtaposed in a nineteenth centurie time o Press Gangs an perilous sea journeys.
Alangside this picter o the fishermen an hunters o the North, trapping bear, dealin in furs, skillfully manouverin thir wey deep intae the territory o the Native Americans an this culture, ither complex themes are explorit.
Mark, the central character, fins himself oan a parallel quest; the exploration o his religious beliefs an cultural prejudices. Comin fae a religion similar in monie weys tae the Free Church o Scotland, nae singin, dauncin or general ‘frivolities’, Mark has tae examine his viewpoints. The adornments o hats o fur and beads an ribbons, the storytelling traditions o the Indians (still called this and no yet intae PC jargon), the smoking o pipes an the physical attractions o wimmen, all these delicht bit present him wi a quandary aboot how he views the world aroon him.
A must read fir awbodie wantin tae ken mair aboot the gowden lan o maple syrup an fearsome bears.
This work is protected by copyright. All rights reserved.
The SCOTS Project and the University of Glasgow do not necessarily endorse, support or recommend the views expressed in this document.
Cite this Document
Review of "Voyageurs" (Margaret Elphinstone). 2021. In The Scottish Corpus of Texts & Speech. Glasgow: University of Glasgow. Retrieved October 2021, from http://www.scottishcorpus.ac.uk/document/?documentid=1013&highlight=aroon.
"Review of "Voyageurs" (Margaret Elphinstone)." The Scottish Corpus of Texts & Speech. Glasgow: University of Glasgow, 2021. Web. October 2021. http://www.scottishcorpus.ac.uk/document/?documentid=1013&highlight=aroon.
The Scottish Corpus of Texts & Speech, s.v., "Review of "Voyageurs" (Margaret Elphinstone)," accessed October 2021, http://www.scottishcorpus.ac.uk/document/?documentid=1013&highlight=aroon.
If your style guide prefers a single bibliography entry for this resource, we recommend:
The Scottish Corpus of Texts & Speech. 2021. Glasgow: University of Glasgow. http://www.scottishcorpus.ac.uk.